ايوة حقير!
لما تلاقى كل الناس بتتكلم كانهم فلاسفة عصرهم وساسة زمانهم وان شأن البلاد فى ايدهم وان كلامهم هو القرار اللى هيغير مصير الشعوب وانك لازم ترضى برايهم وتتخلى عن رايك فعلا بتاكد من نظرية العلم بيتكور لما تلاقى الناس فاهمة حاجة وشايفة حاجة ... اى حاجة غير اللى انت فاهمها و شايفها ...واول ما تقول راى مخالف لرايهم ينطلقوا فى التعليقات السخيفة وكانه من حقهم عليك انهم يجرحوا فيك بتصرخ فيهم من جواك ... مع نفسك .. ب تقول لهم افهموا!... اسكتوا!... اخرصوا! وانت بدور وبدور فى دايرة مع نفسك لا فيها حد تعرفه ولا فيها حد يعرفك.
- موقف حقير لما تلاقى محدش فاهمك لا صح ولا غلط ...واللى حتى بيفهمك بدل ما يساعدك بيدوس عليك.
- موقف حقير لما تكون عاجز عن تحقيق اى شىء بتتمناه ومتعرفش حتى تحققه ازاى او بأى وسيلة تقدر تلقاه.
- موقف حقير لما تصحى من النوم...وانت عارف ان امبارح لسة عايش جواك مع نفسك لكن ..انتهى مع كل الناس ومحدش فاكره غيرك ولسة صاحى جواك.
- موقف حقير لما يكون المطلوب انك تسامح وتنسى وتتعاطف وتتهاون وتوافق وترضى وترضخ وتسعى للى الاخر يحبه ويفضله ... والا تعيش فاكر يوم اعتراضك اللى هتندم عليه لانك حر فى تفكيرك وشخصيتك
- موقف حقير لما تعيش وانت مش عايش ومفيش امل فى حاجة تتغير لان الوقت فات ... وعدى الزمن...والاصعب...لما يكون فقدان الامل دا شعور اكتر الناس تفائل.
- موقف حقير لما متلاقيش قصادك اختيار وانك مرغوم غصب عنك مش بكيفك تمشى فى طريق عارف انه مش طريقك.
- موقف حقير لما بشوف دموعى بتلسع عيونى وبحس بوجعها وكل ما امسحها ترجع تانى ..وتلسع عيونى..وتتحدانى..اغمض عينى يمكن تهدا .. مبتهداش لكنها... بتزيد .. وكل ما اقول خلاص كفاكى واصبر عليها ترجع دموعى وتنزل فى تحدى من تانى.
- موقف حقير لما تكون عارف انك فاهم اللى قصادك وهو فاكر انك عبيط ويتمادى فى كدبه.
- موقف حقير لما تعمل اللى تحبه بالغصب رغم انه حقك ومن حقك.
- موقف حقير ان الوقت يمر قصادك وانت عاجز انك تعمل اى حاجة ..مكبل الايادى..اخرص وعاجز اللسان ولكنك .. شايف اللى بيحصل فى صمت وبتراقب دقات الساعة من وقت للتانى فى انتظار لا شىء.
- موقف حقير لما الاسبوع يعدى.. والشهر يعدى .. والسنة تعدى من غير انجاز حقيقىتحس بيه حتى لو كل الناس شايفة ان اتفه كلمة منك انجاز.
- موقف حقير لما تلاقى نفسك فى قالب لا عارف تخرج منه ولا عارف تكون جواه وتفكر مع نفسك تهرب منه ولا تموت جواه..!؟
إمضاء
انا و نفسى
No comments:
Post a Comment